ქორწილამდე

მე და ვატომ ერთმანეთი საერთო მეგობრის საშუალებით გავიცანით. ჩემს მეგობარს Facebook-ზე ატვირთული ჰქონდა ჩემთან ერთად ფოტო და ვატოს მოვეწონე. მეც შორიდან ვიცნობდი თუმცა ვერასოდეს წარმოვიდგენდი, რომ ჩვენ ერთმანეთი შეგვიყვარდებოდა, ჩვენი ასაკიდან გამომდინარე. მისი ასაკი რომ გავიგე საერთოდ არ მოველოდი, რადგან საერთოდ ვერ წარმოვიდგენდი ჩემზე 12 წლით უფროსი თუ იქნებოდა. მე 21 წლის ვარ ის კი 33-ის. თუმცა როგორც იტყვიან სიყვარულმა ასაკი არ იცის. ყველანაირად ვუგებთ ერთმანეთს. ერთ დღესაც დილით ჩემს მანქანაზე  თაიგული დამხვდა, ეს გრძელდებოდა დიდხანს, თითქმის ყოველდღე სახლის კარებთან მხვდებოდა ვარდების უზარმაზარი თაიგული, თუმცა არ ვიცოდი ვინ შეიძლებოდა ყოფილიყო, იმიტომ, რომ არ ვიცოდი ვატოს თუ რაიმე სიმპათია ჰქონდა ჩემს მიმართ. ეს მანამდე არასდროს გამოუმჟღავნებია. ამას მხოლოდ აი ესე, ჩუმად აკეთებდა. ერთ დღესაც მითხრა და ამის შემდეგ დაიწყო ჩვენი სიყვარულის ისტორია.

ხელის თხოვნა

ხელის თხოვნა სამების ეკლესიის ეზოში მოხდა თავის დაბადების დღეზე. თავისი ბაიკით სახლთან მომაკითხა და მითხრა რომ რაღაც საქმე ჰქონდა და უნდოდა გავყოლოდი. სამების ეკლესიასთან მიმიყვანა და მითხრა რომ ეკლესიაში შევსულიყავით და რა თქმა უნდა არც მიფიქრია, რომ ხელს მთხოვდა. ეკლესიიდან რომ გამოვედით ეზოში მხოლოდ მე და ვატო ვიყავით სრულიად მოულოდნელი და ემოციური იყო ყველაფერი ეს იყო ყველაზე ბედნიერი დღე ჩემს ცხოვრებაში რადგან კიდევ უფრო დავახლოვდით და განმტკიცდა ჩვენი სიყვარული.

მზადება ქორწილისთვის

ქორწილისთვის მზადება 3 თვით ადრე დავიწყეთ. ყველა დეტალზე თითქმის მე და ვატოს გვიწევდა სიარული და მოგვარება. ქართული ცეკვის გაკვეთილებზეც კი შევედით, რათა ყველაფერი ორგანიზებულად და ლამაზად გამოსულიყო. ეს პროცესი ძალიან სასიამოვნო იყო, თუმცა სანერვიულო დღითი დღე მატულობდა, რადგან გვინდოდა ყველაფერი ყოფილიყო ისე, როგორც ვგეგმავდით.

კაბა

კაბას რაც შეეხება, ინტერნეტში Dresscode-ს გვერდი ვნახე. ძალიან მომეწონა მათი კაბები და გადავწყვიტე მივსულიყავი და არც მინანია. ჩემი კაბა რომ დავინახე, ძალიან მომეწონა და რომ გავიზომე მივხვდი, რომ სწორი არჩევანი გავაკეთე. ვფიქრობ რომ ჩემი კაბა ძალიან ლამაზი და სადედოფლო იყო.

თმა და მაკიაჟი

მაკიაჟი ნინო მართაშვილს მივანდე და ძალიან კმაყოფილი ვარ, ნინო თავისი საქმის პროფესიონალია და საუკეთესო ვიზაჟისტი. ვარცხნილობა ვინც გამიკეთა სამწუხაროდ მისი სახელი არ მახსოვს, თუმცა უზომოდ კმაყოფილი ვარ, რადგან ძალიან ლამაზი ვარცხნილობა გამიკეთა და დღის ბოლომდე შემინარჩუნდა.

ლოკაცია

ჯვრისწერა სიონის ეკლესიაში გაიმართა, ხელის მოწერა კი ლისის ტბაზე. ქორწილი რესტორან ჭაშნაგირში.

ფოტოგრაფი და ფოტოსესია

ჩვენი ფოტოგრაფი იყო დავით ხვედელიძე და ძალიან კმაყოფილი დავრჩი მისი მუშაობით. ფოტოსესია დაიწყო Georgios Rancho-ზე და შემდეგ ლისზე გაგრძელდა.

ქორწილი

დილით ჩვენ და მეჯვარეები ფოტოგრაფთან და ვიდეოგრაფთან ერთად შევიკრიბეთ Georgios Rancho-ზე წოდორეთში. ულამაზეს ადგილზე, სადაც ნამდვილად ლამაზი სურათები გამოვიდა. შემდეგ ჯვრისწერაზე წავედით, სიონის ეკლესიაში, სადაც მამაომ დაგვწერა ჯვარი და კიდევ უფრო გამაბედნიერა იმ ფაქტმა, რომ უფლის წინაშე ჩვენი გზები გადაიკვეთა და ოფიციალურად გავხდით ცოლ-ქმარი. ხელის მოწერა ლისზე გვქონდა, სტუმრები იქ გველოდებოდნენ. შემდეგ უკვე ლისზე ფოტოგრაფმა თვითონ შეარჩია ადგილები და ფოტოსესია იქ გავმართეთ. ნამდვილად დაღლილი ვიყავი, თუმცა ალბათ უფრო ემოციებისგან. რესოტრანში ვატოს მეჯვარის საჩუქარი დაგვხვდა, ბანერი ჩვენი სახელებით და ლამაზად გაფორმებული. ქორწილი რამდენიმე ქართულმა ცეკვამ შეავსო, მოცეკვავეებმა იდეალურად გაართვეს თავი და უფრო ლამაზი და დახვეწილი გარემო შექმნეს. იდეალურად ჩაიარა ყველაფერმა, რადგან მეორე დღეს ყველა აღფრთოვანებული გვირეკავდა, ჩვენც ვცდილობდით ყველა სტუმარს მაქსიმალური სიამოვნება მიეღო და ამისათის ყველაფერი გავაკეთეთ.

საქორწილო მოგზაურობა

სამწუხაროდ საქორწინო მოგზაურობა არ შედგა, რადგან პატარას ველოდებით და ვარჩიეთ საქართველოში დავრჩენილიყავით თუმცა მომავალში დიდი გეგმები გვაქვს.

რჩევა მომავალ პატარძლებს

ყველა პატარძალს ვურჩევ, რომ ეცადოს და არ ინერვიულოს, რადგან ის დღე მისია და მაქსიმალურად უნდა გამოიყენოს, რომ კარგად დაამახსოვრდეს, ეს ხომ პირველი ნაბიჯია ბედნიერებისკენ!