ქორწილადე

მე და ლაშამ ერთმანეთი 4 წლის წინ გავიცანით საერთო მეგობრის მეშვეობით. საერთოდ ძალიან რეალისტი ვარ და ვერ ვხედავ  სამყაროს ისეთ ნათელ ფერებში, როგორც მაგალითაც ჩემს ირგვლივ, თუნდაც ჩემი მეგობრები, ყოველი ახალი ყმაწვილის გაცნობისას აღტაცებით რომ მესაუბრებოდნენ ხოლმე მათზე და გაცნობის თარიღს განსაკუთრებით ინიშნავდენენ, შემდეგ კი  ამბობდნენ, რომ  უბრალოდ გატაცება იყო და ამ გატაცებასთან ერთად ის თარიღიც იშლებოდა და ქრებოდა.. ლაშამ კი სრულიად შემცვალა და უფრო ნათელი ფერები შესძინა ჩემს ცხოვრებას.. გაცნობის დღიდანვე ძალიან მომეწონა, მაგრამ სერიოზულად ვერ აღვიქვამდი და ჩემს თავს ბოლომდე  დიდი ხანი არ ვუტყდებოდი. რა თქმა უნდა, არც მას. თავიდან თითქმის საერთოდ არ მაქცევდა ყურადღებას,რაც ძალიან უჩვეულო და გამაღიზიანებელი  იყო ჩემთვის, მაგრამ ეს უფრო მიზიდავდა. შემდეგ უკვე არ ვიცი რა შეეიცვალა, მოვლენები სწრაფად განვითარდა, აქტიურად ცდილობდა ჩემთან დაახლოვებას. მაგრამ  იმის გამო, რომ  რადიკალურად განსხვავებული და რთული ხასიათები გვაქვს, ძალიან გაგვიჭირდა საერთო ენის გამონახვა.  მაშინ,  როდესაც ის ფიქრობდა, რომ არაფერი გამოვიდოდა მე ვიცოდი რომ სწორედ აქ იწყებოდა ჩვენი სიყვარულის ისტორია და ზუსტად ეს იყო ჩვენი „ შემოდგომა“ . ძალიან ბევრი წინაღობის გადალახვა მოგვიწია, გვქონდა განშორებაც,   რაღაც მიზეზების გამო, მაგრამ საბოლოოდ მაინც ერთად დავრჩით და   ვფიქრობ, რომ არა ეს ყველაფერი, ჩვენი ურთიერთობა დღეს ასეთი მტკიცე  და სასიამოვნო ვერ იქნებოდა..

ხელის თხოვნა

ხელის თხოვნა ისე უცებ მოხდა, არც კი ველოდი.. ერთ დღესაც გამომიცხადა, რომ უნდოდა ჩვენს ოჯახებს ერთმანეთი უფრო ახლოს გაეცნოთ და რა თქმა უნდა, უარი არ მიუღია.. ძალიან მოულოდნელი  იყო და მზად არც კი ვიყავი ალბათ, მაგრამ  სწორედ მაშინ მთხოვა ხელი და ასე ვთქვათ ნიშნობა შედგა.  ეს იყო 2017 წლის 10 ივნისი. უცნაური და უჩვეულო გრძნობა იყო, თუმცა სასიამოვნო..

მზადება ქორწილისთვის

ოქტომბერში გახდა ცნობილი, რომ ქორწილის თარიღი 17 ნოემბერი იქნებოდა. ამიტომ მოსამზადებლად ძალიან ცოტა დრო გვქონდა. მაგრამ ჩემი მეუღლის, მეგობრების და ჩვენი ოჯახების  დახმარებით  მოვახერხეთ ყველაფრის ამ მცირე დროში ორგანიზება. ვფიქრობდი როგორი იქნებოდა  საპატარძლო კუთხე და ასევე ბევრს ვფიქრობდი როგორი ვიქნებოდით ჩვენ ოთხნი, მე ლაშა და ჩვენი მეჯვარეები.. ლაშა ყოველთვის მეუბნებოდა რომ ძალიან უცნაური აზრები მაწუხებდა და გემოვნებაც რაღაცნაირი გაქვსო. ხოდა არც ქორწილის მზადების დროს მიმტყუნა გემონებამ  და ერთ დღესაც ჩემს მეჯვარესთან წარმოვთქვი აზრი, რომ ლაშა და მისი  მეჯვარე იქნებოდნენ ვიშნისფერ ფერებში გამოწყობილები, რადგან ეს ფერი ძალიან მომწონდა..   თავიდან  ძალიან სასაცილოდ გვეჩვენებოდა,მაგრამ არც თუ ისე დიდი თხოვნის შემდეგ დავითანხმეთ ბიჭებიც და  ამან ძალიან დიდი მოწონება დაიმსახურა..შედეგს  თქვენც იხილავთ..

კაბა

კაბა- ყველაზე დიდი საზრუნავი მომავალი პატარძლებისთვის..  ნიშნობის შემდეგ უკვე აქტიურად დავიწყე ფიქრი თუ როგორი უნდა ყოფილიყო კაბა, რომელიც მე უნდა ჩამეცვა. გადაწყვეტილებაც მალე მივიღე..  დღეს ყველა პატარძალი ფიქრობს და ოცნებობს რაღაც საუცხოო კაბაზე, ისეთზე, რომელიც ყველასგან განსხვავებული და გამორჩეული იქნება რაღაც ნიშნით,მაგრამ სამწუხაროდ ყველა კაბა უკვე ერთმანეთს ჰგავს და გადავწყვიტე, რომ ჩემი კაბა იქნებოდა მორგებული მხოლოდ ჩემს  გემოვნებაზე და აქ უკვე მთავარი იყო მე მეგრძნო თავი კომფორტულად..  ჩემი კაბა, თმა და მაკიაჟი მივანდე პროფესიონალთა ჯგუფს „MAGIA BEAUTY SALON“ . კაბის შეკერვის პროცესში მეც აქტიურად ვიღებდი მონაწილეობას, რაც ძალიან დიდ სიამონებას მანიჭებდა. მინდა ძალიან დიდი მადლობა გადავუხადო მათ ასეთი საოცრების შექმნისთვის..

თმა და მაკიაჟი

როგორც უკვე აღვნიშნე თმა და მაკიაჟი სალონ „MAGIA” ში გავიკეთე.  თავისი საქმის უდაო პროფესიონალმა მაია  შაინიძემ  გამილამაზა ჩემთვის ყველაზე მნიშვნელოვანი დღე.  ის  დაუღალავად შრომობდა იმისთვის, რომ თავად ყოფილიყო კმაყოფილი თავისი  ნამუშევრით, ასევე ვარცხნილობაც იქვე შერჩეულმა დიადემამ დამიმშვენა..  რაღა თქმა უნდა ძალიან  ძალიან კმაყოფილი ვარ და მინდა უღრმესი მადლობა  გადავუხადო  მას და მთელ  ჯგუფს.

ფოტოგრაფი და ფოტოსესია

ბევრი ვიფიქრე თუ სად შეიძლებოდა მოგვეწყო ფოტოსესია, ძალიან მომწონდა ციხისძირში მდებარე სასტუმრო  კასტელო მარე და მისი მიმდებარე ტერიტორია, ულამაზესი ბუნებით და ზღვის ხედით. მზიანი ამინდი იყო, თუმცა ძალიან ციოდა..  ჩვენი ფოტოგრაფის გუდუ კომახიძის დახმარებით ფოტოსესია იდეალური გამოვიდა და ფოტოებმაც მოლოდინს გადააჭარბა.

ქორწილი

ქორწილის დილა რა თქმა უნდა სალონით დაიწყო, კაბაც მოვირგე და უკვე მზად ვიყავი ლაშასთან შესახვედრად.  ამაღელვებელი და ბედნიერი წუთები იყო.

ჩვენი ქორწილი ლიდერში ჩატარდა, იმდენად დამღლელი აღმოჩნდა ფოტოსესია და ის ყველაფერი რაც ქორწილის დღეს მოსდევს, რომ სიმართლე გითხრათ მღელვარებისთვის ენერგია აღარც კი მქონდა და მოვეშვი..დაიწყო ქორწილიც, სტუმრები ოვაციებით შეგვხვდნენ, ყველაფერი ისე იყო როგორც წარმოგვედგინა და უკეთესადაც კი. დაიწყო გართობა, ჩვენმა მეგობრებმა  ფლეშმობი შემოგვთავაზეს და ძალიან გაგვამხიარულეს, ყველაზე დიდი სიურპრიზი  კი მამაჩემმა გამიკეთა,როცა  მითხრეს რომ გრანდიოზული საჩუქარი ჰქონდა მას ჩემთვის და ეს იყო მანქანა, აი აქ უკვე მაკიაჟზე აღარ მიფიქრია )))  ბოლოს კი თაიგულიი მას გადავეცი ვინც მე და ლაშას გაგვაცნო ერთმანეთი, გაოცებული სახით მიცქერდა, ძალიან სასაცილო სცენა იყო..

ენერგია, რაც ამ ქორწილს დავახარჯეთ სტუმრების მომღიმარი  და გაბრწყინებული სახეების დანახვით უკან გვიბრუნდებოდა და ისევ ისეთივე ენერგიით და სიხარულით გვავსებდა.

საქორწინო მოგზაურობა

სამწუხაროდ სამოგზაუროდ წასვლა ვეღარ მოვახერხეთ ,მაგრამ იმ დღის შემდეგ დღემდე და კიდევ მარად ჩვენი თაფლობის დღეები, თვეები, წლებია..

რჩევა მომავალ პატარძლებს

პატარძლებს ვურჩევდი ნაკლებ ნერვიულობას, დილით რაიმე სასმელი  განწყობისთვის, ეს მოგიხსნით დაძაბულობას, იხალისეთ , დატკბით ამ უბედნიერესი წუთებით თქვენს საყვარელ ადამიანთან ერთად..