“მივხვდით, რომ ჩვენს შორის სულ სხვა კავშირი იყო და რომ გრძნობების დამალვას აზრი აღარ ჰქონდა”

ქორწილამდე

მე და თორნიკემ ერთმანეთი ეკა ხოფერიას თოქ-შოუში გავიცანით. თორნიკე  ანსამბლ „ჰერიო“-ს წევრია, რომელთან ერთადაც  საშობაო სიმღერა „კირიელეისონ“ შევასრულე. მიუხედავად იმისა, რომ  პირველი დანახვისთანავე ორივეს  რაღაც გრძნობა გაგვიჩნდა ერთმანეთის მიმართ,  ერთი წლის მანძილზე არანაირი ურთიერთობა არ გვქონია. ერთი წლის შემდეგ, შემთხვევით ერთ-ერთ სუფრაზე მოვხვდით, სადაც გამოველაპარაკეთ ერთმანეთს და  ფაქტობრივად ამ დღიდან დაიწყო ჩვენი ურთიერთობა. თავიდან ვმეგობრობდით. შემდეგ, როდესაც გერმანიაში გავემგზავრე 10 დღით და ერთმანეთთან საუბარში ვათენებდით და ვაღამებდით, მივხვდით, რომ ჩვენს შორის სულ სხვა კავშირი იყო და რომ გრძნობების დამალვას აზრი აღარ ჰქონდა. გერმანიიდან დაბრუნების შემდეგ ხშირად ვხვდებოდით ერთმანეთს. თორნიკე მალევე გამომიტყდა სიყვარულში, რაზეც, რაღა თქმა უნდა, მეც დადებითად ვუპასუხე.

ხელის თხოვნა

როგორც ასეთი, ხელის თხოვნა არ ყოფილა. ერთად, შეთანხმებულად გადავწყვიტეთ დაქორწინება და ეკლესიური ნიშნობა გავმართეთ.

მზადება ქორწილისთვის

ქორწილის სამზადისში მთლიანად ვიყავი ჩართული. მინდოდა, რომ ყველაფერი ისე ყოფილიყო, როგორც ვოცნებობდი. თორნიკე ამაში მთლიანად მიწყობდა ხელს და ჩემს ყველა იდეაზე მეთანხმებოდა და მეუბნებოდა, რომ გაგვეკეთებინა ყველაფერი ისე, როგორც მინდოდა და წარმომედგინა.  ჩვენი დიზაინერი იყო თაკო დოლაბერიძე, რომელიც დარბაზის დიზაინზე და ქორწილის მსვლელობასა და ყველა ძირითად საკითხზე ზრუნავდა.

ქორწილამდე რამდენიმე დღით ადრე ჩემმა მეგობრებმა სიურპრიზად bachelorette party მომიწყვეს. ჩემმა ერთ-ერთმა მეჯვარემ დამირეკა და მთხოვა, რომ მასთან წყნეთში ავსულიყავი და დავრჩენილიყავი. აგარაკზე მისულს, ეზოში  თვალებახვეული შემიყვანეს და როდესაც სახვევი მომხსნეს, ჩემი ყველა მეგობარი იქ დამხვდა. დრესკოდიც კი ჰქონდათ, მამაკაცურ ფორმაში იყვნენ გამოწყობილები. თავზე გვირგვინი დამადგეს და მითხრეს, რომ ეს ჩემი წვეულება იყო.

კაბა

კაბა ყველაზე ადვილად გადავწყვიტე, არადა მეგონა, რომ ეს ყველაზე რთული საკითხი იქნებოდა. ვფიქობდი შემეკერა, მაგრამ არ ვიცოდი როგორი სტილის კაბა მინდოდა, მხოლოდ ის ვიცოდი, რომ მინდოდა პრინცესული და გამორჩეული ყოფილიყო. ჩვენი ოჯახის მეგობარმა, ეკო ფანგანმა მირჩია, რომ  მივსულიყავი კაბის სალონში და ყველანაირი სტილის კაბა მომეზომა, რადგან შეიძლება ისეთი დიზაინის კაბა მომხდომოდა, რომელსაც ვერც კი წარმოვიდგენდი. მართლაც, მარიონელაში მისვლისთანავე პირველი დავინახე  ეს კაბა და  ვთქვი, რომ  ეს უნდა ყოფილიყო ის, რაც ჩემს ბედნიერების დღეს მეცმეოდა.

ტორტი

ტორტი მინდოდა ყოფილიყო არც ძალიან გადატვირთული და არც ძალიან სადა, საბოლოოდ იმდენად ლამაზი ტორტი გამოვიდა, როგორიც არასოდეს მინახავს.

 ლოკაცია

ჯვარი მცხეთის დედათა მონასტერში  დავიწერეთ, ხელი კი რესტორან „გუჯარის“ ულამაზეს ეზოში მოვაწერეთ. ამ რესტორანშივე გავმართეთ უშუალოდ ქორწილი.

 ქორწილი

ქორწილის დღის ამინდზე ძალიან ვნერვიულოდბით, იმიტომ რომ წინა დღეებში ხშირად წვიმდა. მაგრამ გაგვიმართლა და არაჩვეულებრივი, მზიანი ამინდი შეგვხვდა.  ქორწილის დღეს თორნიკე სახლში გვესტუმრა.  სახლიდან გაცილებისას მისმა მეგობრებმა მავალჟამიერი შეასრულეს, რომელიც იმდენად ემოციური იყო, რომ ცრემლები ვერ შევიკავე. ჯვრისწერიდან პირდაპირ რესტორნისკენ გავემართეთ, რომლის ულამაზეს ეზოში გვქონდა ფოტოსესია, შემდეგ კი ხელმოწერის ცერემონია . ქორწილს უამრავი ცნობილი ადამიანი და მომღერალი ესწრებოდა, შესაბამისად ჩვენი მუსიკალური პროგრამა ძალიან მრავალფეროვანი იყო, რაც უფრო მხირულსა და დასამახსოვრებელს ხდიდა ამ დღეს. მე და თორნიკემ პირველი ცეკვა დაისი შევასრულეთ ხოლო შემდეგ – ვალსი. ასევე ვიმღერეთ დუეტში.  საბოლოოდ ქორწილმა არაჩვეულებრად ჩაიარა და მოლოდინს გადააჭარბა. ყველა ძალიან ნასიამოვნები და კმაყოფილი იყო.

საქორწინო მოგზაურობა

თაფლობის თვე მართლაც რომ საუკეთესო გვქონდა. ჩემი და თორნიკეს სურვილები ამ შემთხვევაშიც დაემთხვა და ჩვენს საოცნებო ქვეყანაში, იტალიაში ვიმოგზაურეთ, სადაც ვენეცია, ფლორენცია და რომი მოვინახულეთ. ძალიან რომანტიული ქვეყანაა, საოცრად კმაყოფილები ვართ ჩვენი არჩევანით.

რჩევა მომავალ პატარძლებს

ყველაზე მთავარს, რასაც ვურჩევ პატარძლებს არის ის, რომ ეცადონ არ ინერვიულონ და მაქსიმალურად მიიღონ სიამოვნება  ამ არაჩვეულებრივი დღისგან.