2017 წლის 24 ივნისი განსაკუთრებული და დაუვიწყარი აღმოჩნდა. იმ პერიოდში საკმაოდ დაძაბული და დამღლელი რეჟიმით მიწევდა ცხოვრება, ნიკამ კი ჩემთვის განტვირთვის მოწყობა გადაწყვიტა და გუდაურში შემომთავაზა წასვლა. (ეს ადგილი ჩვენთვის განსაკუთრებული და გამორჩეულია) თავდაპირველად ისევ მოუცლელობა მოვიმიზეზე და უარი ვუთხარი, თუმცა მალევე დამითანხმა. მზიანი დღე იყო და საკმაოდ ცხელოდა გზაში რამდენჯერმე გავჩერდით, ალბათ ყველა დამეთანხმება, რომ საოცრად ლამაზია მთიულეთი და სანახავიც საკმაოდ ბევრია. ბოლოს გუდაურის გადმოსახედთან გავჩერდით. ახლობელს ველოდებიო და იმდენ ხანს მალოდინა მანქანაში ჩამეძინა. ახლად გაღვიძებული კი ისე აღმოვჩნდი ცაში გააზრებაც ვერ მოვასწარი. პარაპლანით გავფრინდით ორივე და სწორედ იქ მთხოვა ხელი. დაუვიწყარი და საოცრად ამაღელვებელი მომენტი იყო. საოცარი ბუნება, საოცარი შეგრძნებები და მომენტი, რომელსაც ყველა გოგო მოუთმრნლად ელის. ამ დღეს ორი ოცნება ერთდროულად ამიხდა: ნიკას ხელის თხოვნა და ფრენა. იმ მომენტში რეალურადაც და ემოციურადაც მეცხრე ცაზე ვიყავი. ახლაც ხშირად დავხუჭავ ხოლმე თვალებს და წარმოვიდგენ იმ მოცემულ მომენტს, ეს იყო საოცრება. გუდაურის შემდეგ ბაზალეთზე წავედით და ვღებულობდით მოლოცვებს, მას შემდეგ კი ნიშნობის თვე გამოვიგონეთ და მთელი თვის მანძილზე განსხვავებულად აღვნიშნავდით ჩვენს ნიშნობას. 2 ივლისს კი ოფიცისლური სახე მიიღო ჩვენმა ნიშნობამ, ოჯახებისა და ახლო ნათესავების გარემოცვაში. ვეცადე ეს დღეც განსაკუთრებული ყოფილიყო, თეთრი კაბით, ტორტით, რესტორანიც საგულდაგულოდ შევარჩიე და ჩვენს ისტორიას კიდევ ერთი ლამაზი თარიღი შევმატეთ.

ქორწილისთვის მზადება დაახლოებით 3 თვით ადრე დაიწყო. ჩემი ხასიათიდან გამომდინარე ხშირად ვიცვლიდი აზრს და ქორწილის განსხვავებულ ვარიანტებს ვიფიქრებდი. საბოლოოდ კი ორივემ ერთად გადავწყვიტეთ ეს ყველაფერი საზღვრებს გარეთ მომხდარიყო. რადგან ქორწილი ზამთარში დავგეგმეთ, ლოკაციად ჩემი საოცნებო ქვეყანა, ტაილანდი შევარჩიეთ. ყველაფერი მარტივად მოხდა, დავუკავშირდით ტურისტულ კომპანიას და უმოკლეს დროში ცერემონიის ყველა დეტალი, ჩვენი სურვილების გათვალისწინებით მარტივად მოაგვარეს. სამზადისი იყო საკმაოდ სახალისო და საინტერესო პროცესი. მე და ნიკა ურთიერთშეთანხმებულად ვმოქმედებდით, რამაც საკმაოდ დადებითი შედეგი გამოიღო.

ყველა პატარძალი განსაკუთრებით ნერვიულობს, როცა საქმე მის ვიზუალსა და სურათებს ეხება. ყველას სურს განსაკუთრებული დღე, საოცარ კადრებად აქციოს, თუმცა ამ მხრივ არჩევანის საშუალება არ მქონია, რადგან როგორც უკვე აღვნიშნე ქორწილის ლოკაცია ტაილანდი იყო და მხოლოდ ინტერნეტის საშუალებით შემეძლო შემეთანხმებინა დეტალები. კომპანიამ, რომელმაც თავიდან ბოლომდე უზრუნველყო ქორწილის ორგანიზება ამ დეტალებზეც იზრუნა და ვფიქრობ, ჩემი მოლოდინებიც გამართლდა. გამიმართლა, რადგან როგორც წესი, ცდილობენ დაიჭირონ და აღბეჭდონ განსაკუთრებული დეტალები. ჩვენს შემთხვევაში კი ყველაფერი იმდენად ზღაპრული იყო, ფოტოაპარატმა ყველაფრის აღბეჭდვა ვერც კი მოახერხა. ეს იყო დაუჯერებელი სილამაზე, რომელიც გაკარგვინებს უნარს აღიქვა რეალობა. ეს დღე იყო ზღაპარი რეალობაში.

ქორწილი სასტუმრო centara grand mirrage -ის ტერიტორიაზე შედგა. არაჩვეულებრივი სასტუმროა არაჩვეულებრივი ხედებითა და სანაპიროთი. გვინდოდა ქვიშიან სანაპიროზე გვექორწინა და ეს ოცნებაც ახდა. არაჩვეულებრივი დეკორაციები დაგვახვედრეს და განსაკუთრებით მოხიბლული ტაილანდის ულამაზესი ბუნებრივი ყვავილებით დავრჩი. წინა დღეს შევხვდით ორგანიზატორებს, კიდევ ერთხელ დავაზუსტეთ ყველა დეტალი თუმცა ნანახმა მოლოდინს გადააჭარბა.

ჩვენი თაფლობის თქვე აქვე გაგრძელდა. ვცდილობდით რაც შეიძლება მეტი გვენახა, მეტი გაგვეგო იმ ქვეყნის კულტურის შესახებ, სადაც ვიმყოფებოდით და ფაქტობრივად სულ დავდიოდით. აქვე ავიხდინეთ კიდევ ერთი ოცნება და ვცადეთ დაივინგი, რამაც კიდევ უფრო გაამძაფრა ჩვენი ემოციები. ბედნიერებაა, როცა ხარ იქ, სადაც გსურს, ვისთან ერთადაც გსურს და აკეთებთ რასაც გინდა. ჩვენ გვესმის ერთმანეთის და ვიცით, როგორ ვაქციოთ ჩვეულებრივი წუთები არაჩვეულებრივად. ბედნიერებას კი მხოლოდ დანახვა უნდა… ჩვენ ვხედავთ მას!